Kāpeka: Kei waho a Tama rāua ko Kiri e kori ana me te pāoro. Kei te āwangawanga a Tama mō te oranga o tōna whānau. Ka tahuri ia ki a Kirihaehae ki te whāriki o ōna āwangawanga.
Tama:
E maumahara ana koe ki te wā i te noho tahi tātou katoa i te mōtēra?
Kirihaehae:
Āe, e maumahara ana ahau.
Tama:
He pai tērā nohoanga ki a koe?
Kirihaehae:
Ummm, kāore i tino kino ki a au, engari kāore hoki i tino pai. He aha ai?
Tama:
E kore rawa au e pīrangi kia hoki ki tērā oranga, e Kiri. Kāore i pai ki a au te noho mōtēra.
Kirihaehae:
He aha ai Tama? Kāore i pērā rawa te kino. Ka uru katoa tātou ki te rūma kotahi. He nui ngā tāngata me ngā tamariki hei hoa kori mōku. He maroke te kōrero ki a koutou anake. He tino pīrangi nōku te hāereere kia kite i te ao, kia tutaki hoki i te tāngata.
Tama:
Āe, he pai hoki tērā. Engari e āwangawanga ana ahau ki a Johnny. E tino māuiui ana ia. Kāore koe i rongo i tana rewharewha inapō?
Kirihaehae:
Kāo! I tino pai taku moe inapō!
Tama:
Aiare e kare. I te kino te rewharewha o Johnny inapō, kāore a māmā rāua ko pāpā i moe.
Kirihaehae:
Nē hā? Wī, kāore au i mōhio.
Tama:
Āe. Ko taku āwangawanga, kua kino kē atu tana mate huango.
Kirihaehae:
Me mutu tō āwangawanga e Tama. Tekau noa iho tō tāua pakeke. Ehara ēnei āwangawanga i te āwangawanga mō te tamariki.
Tama:
He tika tāu e Kiri. Heoi, me āta whakaaro pea e tāua ki ngā rā e heke mai ana kia kaua tātou e mate ki te hoki ki te noho mōtēra. Heoi, kāore au i te mōhio he aha te huarahi e puta ai tātou i tēnei rawakoretanga kia whai oranga ai tō tāua whānau.
Kirihaehae:
Whakarongo mai ki a au e Tama. Kei Te Puea Marae tātou. Ko tā rātou mahi he Manaaki Tāngata. Ko tātou te hunga rawakore tērā e manaakitia ana e rātou. Nō reira ko rātou pea ka mōhio ki te huarahi e puta ai tātou.
Tama:
Hmmm, he tika pea tāu. Me haere pea tāua ki te kōrero ki a Uncle Huri?
Kirihaehae:
Haere koe. Kei te haere au te kimi i a Annie.
